އައިއޯއައިޖީގައި އިއްޔެއަކީ ރާއްޖެއަށް ކާމިޔާބު ދުވަހެއް

މަޑަގަސްކަރާގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖޭގެ އެތުލީޓުންނާއި ކުޅުންތެރިން މިހާރު ގެންދަނީ މެޑެލް ހޯދައި، ކުރިން ކުޅިވަރުގައި ނުފެންނަ ބައެއް މަންޒަރުތައް ވެސް ދައްކައިދެމުންނެވެ.

އިއްޔެ ނިމުނު އިރު ރާއްޖެއަށް އެއް ރަން މެޑެލް، ތިން ރިހި އަދި ދެ ލޯ މެޑެލް ވަނީ ހޯދައިދީފަ އެވެ. އެހެންކަމުން އިއްޔެއަކީ ކާމިޔާބު ދުވަހެކެވެ.

ރަން މެޑެލް ކާމިޔާބުކުރީ ގައުމީ އަންހެން ޓީޓީ ޓީމެވެ. މިއީ 2019ގައި އޮތް އައިއޯއައިޖީގައި ރާއްޖޭގެ ޓީމުން ހޯދި ރަން މެޑެލް ދިފާއުކޮށް، މި ގޭމްސްގައި އެ ކުޅުންތެރިންގެ މަގާމު ދެމެހެއްޓުމެވެ.

ޓައެކްވެންޑޯގައި ދެ ރިހި މެޑެލް ކާމިޔާބުކުރީ 53 ކިލޯގެ ދަށުގެ ބައިން ފާތުމަތު އިބްރާހިމް އާއި ފިރިހެނުންގެ 87 ކިލޯގެ ދަށުގެ ބައިން އަހުމަދު ފަޒީލް އެވެ. ލޯ މެޑެލް ހޯދީ އަންހެނުންގެ 62 ކިލޯގެ ދަށުގެ ބައިން ފާތުމަތު އާއި 46 ކިލޯގެ ދަށުގެ ބައިން ޖަންނަތު ޖަވާދު އެވެ.

އައިއޯއައިޖީއަކީ ރާއްޖެއަށް ގިނަ މެޑެލްތަކެއް ލިބުމުގެ ފުރުސަތު އޮންނަ ގޭމްސްއެކެވެ. އެހެންކަމުން ބައެއް ކުޅިވަރުތަކުން މެޑެލްގެ އަމާޒުތައް ކަނޑައަޅައިގެން މަސައްކަތްކުރެ އެވެ.

މި ގޭމްސްގައި ކުރިންސުރެ ބެޑްމިންޓަން އާއި ޓީޓީގައި ރާއްޖޭގެ ކުޅުންތެރިން، އެހެން ގައުމުތަކާ އެއްވަރުގެ ވާދައެއްކުރެ އެވެ. އެކަމަކު 2019ގެ ގޭމްސްގައި ދިވެހި އަންހެން ޓީޓީ ކުޅުންތެރިން ހޯދި ވަރުގެ ކާމިޔާބީއެއް މިހާތަނަށް އަދި ލިބިފައެއް ނުވެ އެވެ. އެ ފަހަރު ތިން ރަން މެޑެލް ރާއްޖެއަށް ގެނެސްދިނެވެ.

ޓީޓީގެ އިންޑިވިޖުއަލް ބައިން ވެސް ރާއްޖެއަށް މެޑެލް ލިބުމުގެ ފުރުސަތު ބޮޑެވެ. ދީމާއަކީ އެންމެ ފަހުން އޮތް ގޭމްސްގެ ޓީޓީގައި އަންހެން ސިންގަލްސް ޗެމްޕިއަނުންނެވެ. އޭނާގެ ޑަބަލްސް ޕާޓްނަރު އައިޝަތު ރަފާ ނާޒިމްއާ އެކު އެ ފަހަރުގެ އަންހެން ޑަބަލްސް ޗެމްޕިއަންކަން ވެސް ހޯދި އެވެ.

ރާއްޖޭގެ ފިރިހެން ޓީޓީ ޓީމު މަޑަގަސްކަރަ އަތުން އިއްޔެ 3-2 އިން ބަލިވި ނަމަވެސް އެ ކުޅުންތެރިން އެވަނީ ތާރީހު ލިއެލައިފަ އެވެ. މިއީ ބޭރުގެ މުބާރާތެއްގެ ފައިނަލްގައި މިހާތަނަށް ކުޅުނު ހަމައެކަނި ގައުމީ ފިރިހެން ޓީޓީ ޓީމެވެ. މުބާރާތުގައި ފިރިހެން ކުޅުންތެރިން ދައްކަމުން އަންނަ ކުޅުމަށް ބަލާއިރު، ކުރިއަށް އޮތް އިންޑިވިޖުއަލް ބައިން ވެސް މެޑެލްއާ ހަމައަށް ދިއުމުގެ ފުރުސަތު އެބަ އޮތެވެ.