ޕާޓީތަކަށް ބަޖެޓުން ފައިސާ ދޫކުރުން ހުއްޓުވަން ބިލެއް ހުށަހަޅާނަން: ރިޔާޒު

ސިޔާސީ ޕާޓީތަކުގެ ދަފުތަރަށް ބަލައިގެން ދައުލަތުން ޕާޓީތަކަށް ފައިސާ ދޫކުރުން ހުއްޓުމަކަށް ގެނައުމަށް ރައްޔިތުންގެ މަޖިލީހަށް ބިލެއް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު އަދި މޯލްޑިވްސް ނޭޝަނަލް ޕާޓީ އެމްއެންޕީގެ ޕީޖީ ލީޑަރު އަބްދުﷲ ރިޔާޒު މިއަދު ވިދާޅުވެއްޖެ އެވެ.

އެނގުން މުހިންމު - މީހުންނަށް ނޭނގި އެ މީހުން ޕާޓީތަކަށް ވައްދާ މައްސަލަ އާންމުވެ، މި ފަހުން އިލެކްޝަންސް ކޮމިޝަނުން ވަނީ އެކަމަށް ފިޔަވަޅު އަޅަން ނިންމައިފަ އެވެ. އެގޮތުން މި މަހުގެ އެއްވަނަ ދުވަހުން ފެށިގެން ޕާޓީތަކަށް ވަންނަން އެދޭ ފޯމުތަކުގެ ލިސްޓު އެ ކޮމިޝަނުގެ ވެބްސައިޓުގައި އާންމު ކުރަން ވަނީ ނިންމައިފަަ އެވެ.

ގުޅުންހުރި ކަމެއް - އިދިކޮޅު ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ އެކަމާ ގުޅޭ ކުއްލި މައްސަލައެއްވެސް މިއަދު މަޖިލީހަށް ހުށަހަޅުއްވައިފަ އެވެ. އެކަމަކު، މިއަދު ހުށަހެޅުއްވި ކުއްލި މައްސަލަ މަޖިލީހުން ބޭރުކޮށްލީ އެވެ. އެ މައްސަލަ ބަލައިިރު ނުގަތުމަށް 17 މެމްބަރުން ވޯޓު ދިން އިރު ބަލައިގަތުމަށް ވޯޓު ދެއްވީ 10 މެމްބަރުންނެވެ.

ޕާޓީތަކުގައި ރަޖިސްޓްރީވެފައިވާ މެމްބަރުންގެ އަދަދަށް ބަލައިގެން އިލެކްޝަންސް ކޮމިޝަނުން ކޮންމެ އަހަރަކު ޕާޓީތަކަށް ފައިސާ ދޫކުރެ އެވެ.

ބުނީ ކީކޭ؟ - މިއަދު މަޖިލީހަށް ހުށަހެޅި މައްސަލަ ބޭރުކޮށްލުމާ ގުޅިގެން ކުރެއްވި ޓްވީޓެއްގައި ރިޔާޒު ވިދާޅުވީ، ޕާޓީތަކުގެ ދަފްތަރަށް ބަލައިގެން އިލެކްޝަންސް ކޮމިޝަނުން ކޮންމެ އަހަރަކު ދައުލަތުގެ ބަޖެޓުން ފައިސާދޭހާ ދުވަހަކު ކަން ހިނގާނީ އެގޮތަށް ކަމަށެވެ.

އެކަމަށް ހައްލެއް ގެނައުމުގެ ވިސްނުން ހުރިކަން ވެސް އޭނާ މިއަދު ހާމަ ކުރެއްވި އެވެެ. އެގޮތުން، އޭނާ ވިދާޅުވީ ސިޔާސީ ޕާޓީތަކަށް ފައިސާ ދޫކުރުން ނިމުމަކަށް ގެނައުމަށް ވަރަށް އަވަހަށް އެމްއެންޕީއިން މަޖިލީހަށް ބިލެއް ހުށަހަޅާނެ ކަމަށެވެ.

ގުޅުންހުރި ކަމެއް - ރިޔާޒު އެހެން ވިދާޅުވި އިރު، އެމްއެންޕީގެ ބައެއް ލީޑަރުންގެ މަސްލަހަތު އޮންނަ ރަޝީދު ކާޕެންޓްރީ އެންޑް ކޮންސްޓްރަކްޝަން ކޮމްޕެނީ (އާރުސީސީ) އިން ހުޅުމާލޭގައި ހަދާ އިމާރާތަކުން ފްލެޓް ގަންނަން ފޯމު ލީ މީހުންނަށް ނޭނގި، އެ މީހުންގެ މައުލޫމާތުތައް ބޭނުންކޮށްގެން އެ ޕާޓީއަށް ވައްދަމުންދާ މައްސަލަތަކެއް މިދިޔަ މާޗު މަހު ފެންމަތިވި އެވެ. އެކަމާ ގުޅިގެން އެމްއެންޕީއަށް ވެއްދި ބައެއް މީހުން ކަންބޮޑުވުން ފާޅުކުރި އެވެ.

އިދިކޮޅު ޕީޕީއެމްގެ މެންބަރުންތަކެއް އޮޅުވާލައިގެން އަދާލަތު ޕާޓިީއަށް ވެއްދި ކަމުގެ ތުހުމަތުތަކެއް ޕީޕީއެމުން ކޮށްފައިވެ އެވެ.