އާދިއްތަ ދުވަހު ޓީޖެޓީއާ ހަވާލުވާނަން؛ އެއީ ކައުންސިލްގެ ތަނެއް: މޭޔަރު

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބަލަހައްޓަމުން އަންނަ މާލޭ ޓީޖެޓީ އަކީ މާލޭ ސިޓީ ކައުންސިލްގެ އަމިއްލަ ބިމެއް ކަމަށާއި އަންނަ އާދިއްތަ ދުވަހު ޖެޓީއާ ކައުންސިލުން ހަވާލުވާނެ ކަމަށް މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އެނގުން މުހިއްމު - ޓީޖެޓީ އެމްޕީއެލްއާ ހަވާލުކޮށްފައި ވަނީ، 2015ގައި މުއިއްޒު ހައުސިން މިނިސްޓަރު ކަމުގައި ހުންނަވައިގެންނެވެ. 

ވީ ކިހިނެއް؟ - މިދިޔަ މަހުގެ 8ގައި ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި މުއިއްޒު ވިދާޅުވެފައި ވަނީ:

ޓީޖެޓީ ހަވާލުކުރަން އެމްޕީއެލްއަށް ދިން 90 ދުވަހުގެ މުއްދަތު ހަމަވާނީ އަންނަ އާދީއްތަ ދުވަހު އެވެ. އެހެންކަމުން އެ ދުވަހު ކައުންސިލުން ޓީޖެޓީއާ ހަވާލުވާން ކުރަން ޖެހޭ އެންމެހާ ކަންކަން ކުރުމަށް އިއްޔެ ވަނީ ފާސްކޮށްފަ އެވެ.

އެމްޕީއެލްގެ ބަސް - އެމްޕީއެލްގެ އޮފިޝަލަކު މިއަދު ވިދާޅުވީ، ހައުސިން މިނިސްޓްރީއާ އެކު ސޮއިކޮށްފައިވާ އެއްބަސްވުމުގައި ވަކި މުއްދަތެއް ބަޔާންކޮށްފައި ނެތް ކަމަށާއި ޓީޖެޓީ އެމްޕީއެލް އަތުން ނެގި ނަމަވެސް އެކަން ކުރެވޭނީ ހައުސިން މިނިސްޓްރީއަށް ކަމަށެވެ.

މޭޔަރުގެ ބަސް - ނަމަވެސް މިއަދު ސިޓީ ކައުންސިލްގައި ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި މޭޔަރު މުއިއްޒު ވިދާޅުވީ ލާމަރުކަޒީ ގާނޫނުގެ ދަށުން، މާލޭގެ ބަނދަރުތައް ކައުންސިލާ ހަވާލުކޮށްފައިވާ ކަމަށެވެ. އަދި މުނިސިޕަލްޓީ ޒަމާނުން ފެށިގެން ވެސް ޓީޖެޓީ އަކީ ކައުންސިލްގެ ރަޖިސްޓްރީގައި އޮތް ތަނެއްކަން އޭނާ ފާހަގަކުރެއްވި އެވެ.

"އެއީ ކައުންސިލްގެ އަމިއްލަ ބިމެއް. ގާނޫނީ ގޮތުން ވަރަށް ސާފު، ވަރަށް ސާފު މައްސަލައެއް،" މޭޔަރު ވިދާޅުވި އެވެ.

މުއިއްޒު ވިދާޅުވީ އެކަމާ ރައީސް އޮފީހުން ވެސް ދެކޮޅު ނުހަދާ ކަމަށާއި، ނަމަވެސް ކައުންސިލާ ޓީޖެޓީ ހަވާލުކުރަން ރައީސް އޮފީހުން ދެކޮޅުހަދާފައިވާ ކަމަށެވެ. ޓީޖެޓީ ކައުންސިލާ ހަވާލުނުކުރެވޭނެ ކަމަށް ރައީސް އޮފީހުން އެންގި ނަމަވެސް، ކައުންސިލުން އޮތީ އަންނަ އާދީއްތަ ދުވަހު އެ ތަނާ ހަވާލުވާ ގޮތަށް ކަމަށް އޭނާ ވިދާޅުވި އެވެ.

"އަޅުގަނޑުމެން ބޭނުން ވަނީ މާލޭގެ ރައްޔިތުންނަށް ހިދުމަތް ކުރުމަށްޓަކައި އެ ތަނުން ލިބޭ އާމްދަނީ މާލޭ ރައްޔިތުންނަށް ހޯދައިދިނުމަށް. ސަރުކާރުގެ ކުންފުންޏަކަށް މާލޭ ރައްޔިތުންގެ ބިމަކުން ލިބޭ ފައިސާ ގޮސް ކުންފުނީގެ ބޭނުން ކުރުމަކީ މީ ކޮން ހަމައެއްތޯ؟" މުއިއްޒު ވިދާޅުވި އެވެ.

"އެހެންވީމަ އަޅުގަނޑުމެން ގާނޫނީ އިމުގެ ތެރެއިން ޓީޖެޓީއާ 12 ޑިސެމްބަރުގައި ހަވާލުވާނަން."

މޭޔަރު ވިދާޅުވީ އެކަމަށް ހުރަސްއަޅާ ފަރާތްތަކަކީ ގައިރުގާނޫނީ ކަންތައްތަކެއް ހިންގާ ފަރާތްތަކެއް ކަމަށެވެ.

ގުޅުންހުރި ކަމެއް - ޓީޖެޓީއާ ސިޓީ ކައުންސިލުން ހަވާލުވާނެކަން އެންގި އިރު، ހުޅުމާލޭގެ ބިމުގެ މިލްކުވެރިކަމުގެ މައްސަލައިގައި ކައުންސިލާއި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ވެސް ވަނީ އަރައިރުމަކަށް ގޮސްފަ އެވެ. އަދި ކައުންސިލްގެ މައްޗަށް ދައުވާކުރަން އެޗްޑީސީން ވަނީ ނިންމައިފަ އެވެ.