އެޗްޑީސީން ދޫނުދިން؛ ސިޓީ ކައުންސިލް ގޮވައިގެން ކޯޓަށް

މާލޭ ސިޓީ ކައުންސިލުން ހުޅުމާލޭގެ ބިމުގެ ރަޖިސްޓްރީ ބާތިލްކުރީ ގާނޫނާ ހިލާފަށް ކަމަށާއި، އެކަމުގެ ސަބަބުން ހައުސިން ޑިވެލޮޕަމަންޓް ކޯޕަރޭޝަން (އެޗްޑީސީ) އަށް ލިބޭ ގެއްލުމުގެ ބަދަލު ހޯދަން ކައުސިލްގެ މައްޗަށް ދައުވާ އުފުލާނެކަމުގެ އިންޒާރު އެ ކުންފުނިން ދީފި އެވެ.

މައްސަލައިގެ ފެށުން - ހުޅުމާލޭގައި މުނިސިޕަލް ހިދުމަތްތައް ދިނުން މާލޭ ސިޓީ ކައުންސިލްގެ ދަށަށް ބަދަލު ކުރުމަށް މިދިޔަ ލޯކަލް ކައުންސިލް އިންތިހާބުގެ ކެމްޕޭން ތެރޭގައި ސަރުކާރުން ވައުދުވި އެވެ. ނަމަވެސް، އިންތިހާބުގައި އިދިކޮޅު ޕީޕީއެމް އިން ކައުންސިލްގެ ސާފު މެޖޯރިޓީ ނެގުމުން، އެ މަސައްކަތް އޮތީ ހުއްޓިފަ އެވެ. އެއާ އެކު، ހުޅުމާލެއާ ގުޅޭ ގޮތުން މާލޭ ސިޓީ ކައުންސިލާއި ހުޅުމާލެ ބަލަހައްޓާ އެޗްޑީސީ އޮތީ އަރައިރުމަކަށް ގޮސްފަ އެވެ.

އެ އަރައިރުން ހޫނުވެ، މާލޭ ސިޓީ ކައުންސިލުން އެޗްޑީސީއަށް ހައްދައިދީފައިވާ ހުޅުމާލޭގެ ރަޖިސްޓްރީ ބާތިލްކުރުމަށް ކައުންސިލުން މިއަދު ފާސްކުރި އެވެ.

ތަފްސީލް - އެ މައްސަލައިގައި އެޗްޑީސީން މިރޭ ނެރުނު ބަޔާނެއްގައި ބުނީ، ކައުންސިލްގެ ނިންމުމަކީ ގާނޫނާ ހިލާފު ނިންމުމެއް ކަމަށާއި، އެ ނިންމުން ކުށްވެރިކުރާ ކަމަށެވެ.

"އަދި މިކަމުގެ ސަބަބުން މި ކޯޕަރޭޝަނަށް ލިބޭ ގެއްލުމުގެ ބަދަލު ހޯދަން މާލެ ސިޓީ ކައުންސިލްގެ މައްޗަށް ދައުވާ އުފުލާނެ ވާހަކަ ދަންނަވަމެވެ." އެޗްޑީސީން ބުންޏެވެ.

ބުނީ ކީކޭ؟ - އެޗްޑީސީން ބުނީ ހުޅުމާލޭގެ ބިމަކީ، އެ ކޯޕަރޭޝަންގެ އަމިއްލަ ހަރަދުގައި ހިއްކާފައިވާ އަދި އެ ކޯޕަރޭޝަނަށް ރަޖިސްޓްރީކޮށްފައިވާ އަމިއްލަ ބިމެއް ކަމަށެވެ.

އެ ބަޔާނުގައި، އެޗްޑީސީއަކީ މުދާ މިލްކު ކުރުމުގެ ހައްގު ލިބިދީފައިވާ ވަކި ޝަހުސެއްކަން ފާހަގަކުރި އެވެ. އެހެންކަމުން، ހުޅުމާލޭގެ ބިމުގެ މިލްކުވެރިކަން އެޗްޑީސީއަށް ލިބިފައިވާކަން ރަމްޒުކޮށްދޭ ބިމުގެ ރަޖިސްޓްރީ ބާތިލުކުރުމަށް ސިޓީ ކައުންސިލުން ނިންމި ނިންމުމަކީ ގާނޫނާ ހިލާފު، ނާތަހުޒީބީ ނިންމުމެއް ކަމަށް އެ ކުންފުނިން ބުންޏެވެ.

އޭގެ އިތުރުން، ލާމަރުކަޒީ ގާނޫނަށް އަމަލުކުރަން ފެށުމުގެ ކުރިން، އާންމު ރައްޔިތުންނަށާއި ސަރުކާރުގެ އިދާރާތަކަށް ދޫކޮށްފައިވާ އެންމެހާ ވަސީލަތްތަކާއި، ބިނާތަކާއި، ނުއުފުލޭ ހަރުމުދަލާއި ގައުމީ ސަލާމަތަށް ކަނޑައަޅާފައިވާ ތަންތަނުގެ މިލްކުވެރިކަން ލިބިގެންވަނީ ގާނޫނަށް އަމަލުކުރަން ފެށުމުގެ ކުރިން އެތަންތަނުގެ މިލްކުވެރިކަން އޮތް ފަރާތަށް ކަން ވެސް އެޗްޑީސީން ފާހަގަކުރި އެވެ.

އެނގުން މުހިންމު - ލާމަރުކަޒީ ގާނޫނަށް އިސްލާހު ގެނައި އިރު، ހުޅުމާލެ ފޭސް 1 އަދި ފޭސް 2ގެ ބިން ވެސް ވަނީ އަމިއްލަ ބިމެއްގެ ގޮތުގައި އެޗްޑީސީގެ ނަން މަތީގައި ރަޖިސްޓްރީކޮށްދީފަ އެވެ.

އެޗްޑީސީން ބުނީ ވަކި ފަރާތަކަށް ރަޖިސްޓްރީކޮށްދީފައިވާ އަމިއްލަ ބިމެއްގެ މިލްކުވެރިކަން ބަދަލުކުރެވޭނީ ޝަރުއީ ކޯޓެއް މެދުވެރިކޮށްގެން އެކަނި ކަމަށެވެ. އަދި އަމިއްލަ މުދަލަކީ ގާނޫނު ހުއްދަނުކުރާ ގޮތަކަށް ނިގުޅައިގަނެވޭނެ އެއްޗެއް ނޫން ކަމަށާއި، ގާނޫނުގައި ކަނޑައެޅި ބަޔާންކޮށްފައިވާ ގޮތުގެ މަތިން ފިޔަވައި އަދި އެކަމަށްޓަކައި ކޯޓަކުން ކުރާ ހުކުމަކުން މެނުވީ އެއްވެސް ފަރުދެއްގެ މުދަލެއް އެފަރާތުގެ ރުހުން ނެތި ނެގުމަކީ ގާނޫނު އަސާސީން ކަށަވަރުކޮށްދޭ ހައްގެއް ނިގުޅައިގަތުން ކަމަށް ވެސް އެޗްޑީސީން ބުންޏެވެ.

ގުޅުންހުރި ކަމެއް - ހުޅުމާލޭ ބިމުގެ މިލްކުވެރިކަމުގެ މައްސަލަ ހޫނުވީ އިދިކޮޅު ކޯލިޝަނުން ހުޅުމާލޭގައި ހުކުރުދުވަހުގެ ރޭ ޖަލްސާއެއް ބާއްވަން މަސައްކަތްކުރަމުން އަންނަނީ ހުއްދަ ނުނަގައި ކަމަށާއި އެ ގޮތަށް އެކަން ނުކުރެވޭނެ ކަމަށް އެޗްޑީސީން ރޭ ބުނުމުންނެވެ. އެ ޖަލްސާގައި އިދިކޮޅުގެ ލީޑަރު، ކުރީގެ ރައީސް އަބްދުﷲ ޔާމީން ބައިވެރިވަޑައިގަންނަވާ ގޮތަށް ވަނީ ހަމަޖެހިފަ އެވެ.

އިތުރަށް ކިޔާލަން -